Page 12 - Mundartgebete
P. 12
Mei Bittgebet
I bitt di mei Herrgott,
leich du mia dei Liab,
de echte und edle,
de niamois betriab.
I bitt di mei Herrgott,
leich du mia dei Wort,
donn red i nur Guats
und Wahrs oiweifort.
I bitt di mei Herrgott,
leich mia deine Händ,
dass sie dorthi helfn,
wos notwendig send.
I bitt di mei Herrgott,
leich du mia dein Muat,
sodass mei Vastond oim
des Richtige tuat.
I bitt di mei Herrgott,
leich du mia dei Herz,
donn trog i ois leichta,
de Freid und an Schmerz.