Page 8 - Mundartgebete

Fruajohrserwochn

Herrgott, gib da Scholle Kraft,
weck auf wos in ia schlaft,
weck auf wos in ia ruat,
schick drauf dei Sonnengluat.

Herrgott, gib de Felda Segn,
Himme, schick dein warmen Regn,
lass de junge Saat gedeihn,
schick Wärme und dein Sonnenschein.

Herrgott, gib de Wiesn Leb´n,
dass Samen guate Früchte geb´n.
Gseng de warme, braune Ean,
lass de Ernte reich und üppig wean.

Herrgott, gib de Gräsa Saft,
weck auf wos nu im Acka schlaft,
erweck ois Leb´n in da Natur,
in Feld und Wiesn, Woid und Flur.