Page 4 - Brenn_2016

Gedichte 2016 Hubert Brenn (Längenfeld im Ötztal)

Koer vo denene

I mechtat nit oer vo denene sein, die si salt an wichtigschtn nemen
i mechtat ö nit ze denene gehern, die nie genüeg bekemen
i mechtat koer vo denene sein, die moen, es gab lei si
i bin fröe und schtölz drau ze sein, wie i bin, jo, asö mog i mi
I mechtat nit oer vo denene sein, die si salt gor asö löbm
i mechtat nit ze denene gehern, die an jedn Schmeichlar glöbm
i mechtat koer vo denene sein, die si olm gonz vöer züehn drengen
si foel hobm wie a Hüer und harbe iberoll drzwischn zwengen
I mechtat nit oer vo denene sein, die frei iberoll mit schpringen
i mechtat nit ze denene gehern, dies unbedingt mießn zen eppas bringen
i mechtat koer vo denene sein, die moen one si tats nit gean
dies feader hobm auzefolln sö güets geat und drum iberoll züehn schtean
I mechtat nit oer vo denene sein, die noch Beliebm scholtn und woltn
i mechtat nit ze denene gehern, die si gonz fier moßgeblach holtn
i mechtat koer vo denene sein, na, mir kam sö eppas gor nie in Sinn
i bin schtölz auf mi und gonz zefridn drmit, daß i grod asö bin, wie i bin

Seite 4