Page 8 - Rabl 1

Gedichte Anni Rabl

A kloana Vagleich, zo frühra und heut

I fong etz mit´n Bettzeug glei a moi u,

frühra hot´s a Struasock und a werchas Bettzeug tu,

heit is s Bett seida und d´Matratz an hoib´n Meter dick,

und ma kus vaschwind´n lass´n im Kast´n, mit oan Klick.

Frühra hats zon owasch´n a Keansoaf und an Zwoghutt´n geb´n,
heut kuntn´d uni Feichttüachi de hoib´n nimma leb´n.

Fi de Poppei hats frühra a Stoffwindel und de Gummihos tu,

heut gibs de Pampers, homb a koan Strampler mea u.

Da Spiagl dea wor frühra mea kloa,

ma hat´n kot braucht net zon kampin alloa.

Frühra is g´wes´n mit´n Rasiermesser zon rasiern,
host müass´n mitn Rasierpemstl d´Rasiersoaf urühr´n.

Heutzutag gibs Rasierer mit Akku, kuste komott rasiern,

kust nebnbei nu gmüatlich durch d´Wohnung spazier´n.

Host miass´n frühra auf´s Häusl, bist gsaust um d´Lam umma,

net a da ärgest´n Köt´hams a Kochi heagnumma.

Heitzutag is des ganz Bad ois oa Spiaglwond und ausgstatt mit an Wc,

und ausserdem gibs nu a Dusch und an Wirlpool und a Bide.
Heutzutag is a im Winter a jeda Raum warm,

kust s ganz Jahr umanand saus´n mit kuschzärmlige Arm .

Es gib heut a fi gor ois scho a Maschin,

zon Zähnd putz´n, zon fönen, fi außt und fi in,

zon wasch´n, zon putz´n, zon koch´n, und a zon schreib´n,

zon fohr´n und zon schiab´n und sogor a zon schneib´n.

Frühra hombs kob a Best´s, a Nachstabest´s und a Werschtogsgwand,
heit send de Kast´n und Schiwal voi bis zum Rond.

Es is heut ja gonz oafach – hoaßts scho a da Werbung: nimm 3 und zahl 2,

und de Caritassäck send scho gratis dabei.

Seite 8