Page 10 - Brenn_2018

Gedichte 2018 Hubert Brenn (Längenfeld im Ötztal)

Föerchrtschritt

Nuicht ischt mea, wies lengescht gewesn ischt
schier asö, wos hat tolles an Olauffrischt
olte Heiser wern ogerissn, drfier Betonklötzn hea gebauet
di Falder sein mit Hittlen und Mischtloger vrsauet
bis iez grode Wege wern kurvig gemochet
owege werchrt geramet, wos Umwege vrursochet
lei mit dr Orbat kimmet heit niemat mea aus
man kennet si hintn und vöer numma aus
woeß nit wos giltet, wos glöbm ödr sischt
weil oefoch olles onderchrt wöern ischt
a normaler Mensch kimmet schier numma mit
auf eppas inlossn konn man si söwisö nit
Briefe sein iez numma ins Briefkaschtle ze schmeißn
lauter gschpassige Vöergobm wegn nen Tarifn und Preisn
Pöscht, Gschefter und Pöschtn gean züe und au
grod wies nen passet, worum, woeß niemat genau
a nuies Amtle, und schöen schtelln se olles an Köpf
hots ö drvöer güet gekloppet, iez is an olter Zöpf
in Schüelnen ischt auf oemol vil numma wichtig
wos friar folsch gewesn ischt, sogn se, sei iez richtig
in dr Kirchen woeß man ö bold numma wos glöbm
do werchrt umha geton und hin und hea gschöbm
olle wissn, daß a Pforrar koe Weibaz hobm konn
olle wissns, obr lengscht nit olle holtn si dron
Züeschtende hein, die hatts friar oefoch nit getrogn
tüeschte nit mit, köschtets an schier Köpf und Krogn
glei werchrt an a Schtempl augedrucket
und werchrt man in an Egge gerucket
du dorfescht nie eppas lossn, wies ischt
weil de sischt oltmödisch und rickschtendig bischt
drum olles außa reißn und zommschlogn sö gahe und güets geat
weil breits margn gonz eppas Nuies do schteat
begrindet werchrt olles mitn nöetwendign Föerchrtschritt
i bin nit drgegen, obr asö liebar nit

Seite 10